Okkur þykir gaman að segja frá því að við eigum von á hvolpum í lok nóvember. Þeir eru undan innfluttu hundunum okkar Ghazi og Quimbu. Þetta verður fimmta got Ghazi á Íslandi en hann á nú þegar fjögur got hjá þremur öðrum ræktendum. Báðir foreldrarnir hafa lokið BH skapgerðarmati en að auki hefur Ghazi lokið þeim vinnuprófum sem kröfur gera um erlendis (IPO1) auk þess að hafa lokið Kkl1 ræktunarstaðli (Körung / Breed Surveyed).

Deildarsýning Schäferdeildarinnar var haldin 12. október í Mánahöllinni í Keflavík. Dómari sýningarinnar var sérhæfður schäferdómari og voru yfir 50 hundar skráðir. Ghazi var í 1. sæti í vinnuhundaflokk með excellent og meistaraefni. Þá keppti hann við aðra rakka um titilinn Besti rakki tegundar og sigraði einnig þar og fékk sitt annað íslenska meistarastig. Þá keppti hann við bestu tík tegundar og sigraði Ghazi og var valinn Besti hundur tegundar. Að lokum keppti hann við besta síðhærða hundinn og sigraði Ghazi einnig þar og var valinn BESTI HUNDUR SÝNINGAR.

Tveir hvolpar undan Ghazi voru skráðir á sýninguna og sigruðu báðir sína flokka. Tíkin Orka (Kolgrímu Oh my god) var valin Besta tík tegundar í hvolpaflokki 3-6 mánaða (síðhærður schäfer). Rakkinn Síló (Ice Tindra Silo) var valinn Besti rakki tegundar í hvolpaflokki 3-6 mánaða (síðhærður schäfer). Glæsilegur árangur hjá afkvæmum Ghazi og hlökkum við til að fylgjast með þeim.

Við fengum fyrrverandi eigendur Ghazi í heimsókn yfir helgina og sáu þau um að sýna Ghazi fyrir okkur. Þau eru öll professional sýnendur og sýna schäferhunda út um allan heim. Þau þjálfuðu Ghazi frá upphafi (sýningaþjálfun, hlýðni, spor, bitvinna) og kenndu honum allt sem hann kann.

Theodór hefur starfað sem björgunarsveitarmaður á útkallslista í rúm 15 ár. Fyrir 12 árum byrjaði hann að þjálfa Huga með Leitarhundum Slysavarnarfélagsins Landsbjargar, síðan Tind og núna Ghazi. Við fengum nokkrar myndir sendar af Ghazi sem teknar voru á æfinga- og úttektarhelgi Leitarhunda. Ghazi æfði bæði laugardag og sunnudag og tók leitir í víðavangsleit (vindlykt) ásamt sporaleit. Það virðist engu máli skipta hvaða verkefni þessi hundur fær, hann rúllar öllu upp enda gríðarlega vinnusamur. Þrátt fyrir að vera með bæði bitvinnupróf og erlent sporapróf þá er lítið mál að þjálfa hann að auki í víðavangsleit og sporaleit í íslenskri náttúru.

Það er gaman að fá fyrirspurnir frá þeim sem eru að fylgjast með okkur og höfum við fengið spurningar og athugasemdir varðandi það að ala upp þessa tegund með börnum. Á okkar heimili eru börnin alin upp við að eiga schafer, þau þekkja ekki annað og eru öll miklir dýravinir. Hundarnir eru yfirleitt það síðasta sem þau kveðja á kvöldin og það fyrsta sem þau heilsa á morgnana. Stundum æfa þau sig að lesa heimalesturinn fyrir hundana. Hundarnir fylgja okkur allt, í ferðalög innanlands, ganga stundum með krökkunum í og úr skóla og leikskóla, eru með í leikjum úti í garði og fara alltaf með þegar farið er á rólóvöll. Börnin koma með í lausagöngur með hundana og taka þátt í að sinna þeim heimavið. Börnin eru þrjú og eru 9, 6 og 2 ára og hundarnir á heimilinu eru þrír; 12, 4 og 3 ára. Það er vart hægt að sjá hvort samveran gefi börnunum eða hundunum meira. Við getum svo sannarlega mælt með þessari tegund fyrir fjölskyldufólk.

Það var fallegt veður í Hafnarfirði á Norðurlandasýningu HRFÍ laugardaginn 24. ágúst. Ghazi var valinn Besti hundur tegundar og keppti síðar um daginn í úrslitum í Tegundarhópi 1 þar sem hann lenti í 3. sæti. Glæsilegur árangur hjá þessum fallega unga rakka og gætum við ekki verið stoltari og ánægðari með hann. Hann fékk sín fyrstu meistarastig á sýningunni, íslenskt meistarastig og NKU norðurlandastig. Á sunnudeginum var hann valinn Annar besti rakki tegundar og hlaut þá alþjóðlegt meistarastig. Við þökkum Eygló okkar enn og aftur fyrir að sýna hann og Gumma ljósmyndara fyrir að ná fjölmörgum góðum myndum fyrir okkur af Ghazi.

Sumarið hefur farið vel í okkur. Við höfum ferðast innanlands en einnig notið veðurblíðunnar á höfuðborgarsvæðinu. Quimba og Ghazi fóru til Vestmannaeyja og Tindur ferðaðist alla leið á austfirði í vinnuferð. 

​​Sá hörmulegi atburður gerðist í byrjun ágúst að ekið var á Tind meðan hann var í umsjá fósturfjölskyldu sinnar. Tindur hafði verið þar á fóðursamning síðan í vor en dvaldi öðru hverju hjá okkur inn á milli. Hann var nýfarinn frá okkur eftir tveggja vikna dvöl og átti að koma aftur til okkar nokkrum dögum seinna. Það hefur því verið gríðarleg sorg á heimilinu síðustu daga og söknum við hans sárt. Tindur var einn af efnilegustu rökkum landsins, hann var íslenskur meistari, þjálfaður leitarhundur og átti glæsilegan sýningarferil. Það er mikil eftirsjá eftir þessum unga, fallega rakka.

Bella vom Haus Amany er hvolpur sem við höfum fylgst reglulega með frá fæðingu en hún kom í heiminn stuttu eftir að við festum kaup á Ghazi. Hún keppti nýlega á tveimur Sieger sýningum með stuttu millibili en Sieger sýningar eru stærstu schäfersýningarnar og haldnar árlega í hverju landi fyrir sig. Í heimalandi sínu, Hollandi, varð hún í 3. sæti en í Belgíu núna í vikunni sigraði hún (VV1) og hlaut þar með Sieger titil. Virkilega glæsilegur árangur hjá þessari fallegu tík og erum við afar stolt af þeim feðginum. Við hlökkum til að fylgjast með henni í framtíðinni.

Hér eru nokkrar myndir sem teknar voru í maí, júní og júlí. Eins og einhverjir hafa frétt af voru ekki hvolpar í tíkinni skv. seinni sónar en Quimba og Ghazi verða því pöruð aftur í haust.