Hvolparnir hafa allir fengið frábær heimili. Yndislegur tími að baki með þessum duglega hópi og örlítið tómlegt fyrst um sinn að hafa þau ekki hjá okkur. 

Fyrirhugað er að nokkrir hvolpar verði þjálfaðir í vinnu svo sem til björgunar- og leitarstarfa ásamt öðrum sérverkefnum. Fyrst og fremst eru allir hvolparnir þó heimilishundar og hlökkum við mikið til þess að fylgjast með þeim og fjölskyldum þeirra í framtíðinni.

Hvolparnir hafa fengið nöfn og eru þau eftirfarandi:

Eldbergs Brimar
Eldbergs Barri
Eldbergs Bjarkar
Eldbergs Birnir
Eldbergs Bríet
Eldbergs Bella
Eldbergs Birta

Hvolparnir stækka og dafna og verða fjörugri með hverjum deginum. Þau eru byrjuð að fá mat og hafa flutt úr hvolpakassanum yfir í stóra hvolpagrind. Svæðið þeirra þar er mjög stórt og fjölbreitt og býður upp á mikla möguleika. Þegar þau koma yfir í hvolpagrindina 3 vikna sér maður hvað þau verða allt í einu áhugasöm um umhverfið, skoða sig um og prófa sig áfram. Þau eru einnig byrjuð að dilla rófunni og leika hvert við annað. Hvolparnir búa í stofunni hjá okkur og fá klapp og knús á hverjum degi. Nú tekur við umhverfisþjálfun þar sem þau munu kynnast allskonar ólíkum aðstæðum, hljóðum, leikföngum og mismunandi undirlagi. Fljótlega verða þau tilbúin til þess að leika úti og munu þá fá að fara út nokkrum sinnum á dag. Þrátt fyrir að gerðið þeirra sé stórt í dag verður það of lítið fyrir svo stóra og orkumikla tegund og munu þau fá að hlaupa laus hjá okkur inni og úti þegar þar að kemur.

Fyrir tæpum tveimur vikum fæddust hjá okkur 9 hvolpar. Því miður veiktust tveir skyndilega og dóu svo nú erum við með 7 spræka og duglega hvolpa undan Ghazi og Italy. Hvolparnir þyngjast, stækka og dafna vel. Sumir eru farnir að opna augun og nokkrir myndast við að reisa sig upp á lappir og reyna að ganga.

Við erum að byrja að fara yfir hvolpabiðlistann. Þeir sem eru að fylgjast með okkur, eru á biðlistanum og eru enn að bíða eftir hvolpi er velkomið að minna á sig. Við munum fljótlega byrja að hafa samband við þá sem eru á bið hjá okkur.

Eins og margir vita lentum við í hrottalegri árás fyrir um tveimur vikum. Aðeins örfáum dögum eftir að við tilkynntum um væntanlegt got var u.þ.b. hálfu kg af rottueitri dreift um garðinn hjá okkur í bland við pylsubita og kjötbollur. Tveir af hundunum okkar komust í þessa blöndu, væntanlegir foreldrar gotsins þau Ghazi og Italy, og átu þau bæði nokkra bita.

Sem betur fer gerðum við okkur grein fyrir að búið væri að eitra fyrir þeim og var því hægt að bregðast skjótt við með því að framkalla uppköst og komast undir læknishendur þar sem þau fengu bæði lyfjakol og mótefni. Parið hefur verið í reglulegu eftirliti hjá dýralækni síðan þá og hefur tekið því rólega samkvæmt læknisráði. Blessunarlega eru þau á batavegi eftir þennan verknað en augljóst þykir að rottueitrinu, sem komið var fyrir í garðinum okkar í skjóli nætur, var ætlað til þess að valda alvarlegum skaða. Um lífshættulegt efni að ræða sem einungis meindýraeyðar hafa leyfi til þess að kaupa og nota við sérstakar aðstæður.

Við viljum benda fólki á að vera ávallt vakandi fyrir því ef búið er að dreifa matvælum utandyra og leita strax til dýralæknis ef minnsti grunur leikur á eitrun.

Okkar bestu þakkir til allra þeirra sem hafa haft samband símleiðis, í skilaboðum og vefpósti, sent okkur batakveðjur, hlýjar hugsanir eða komið til okkar með fyrirspurnir um líðan hundana. Við kunnum vel að meta þann hlýhug og alla þá aðstoð sem við höfum fengið.

Við fengum staðfest í vikunni að von væri á goti hjá okkur í næsta mánuði. Foreldrar að þessu sinni eru báðir innfluttir: Italy van Liedehof og ISCH AD BH IPO1 Kkl1 Ghazi von Nordsee Sturm. Við erum mjög stolt af þessu goti enda eru foreldrarnir glæsilegir fulltrúar tegundarinnar. Ghazi og Italy koma bæði frá Hollandi og eru frí af mjaðma- og olnbogalosi.

Úttektarhelgi Leitarhunda fór fram á Austfjörðum um helgina og var einn hundur frá okkur, Ghazi, skráður í próf. Tveir hvolpar frá okkur, Apríl og Dixie, voru einnig á svæðinu við æfingar í snjóflóðaleit. Lágmarksaldur í próf er 6 mánaða og eru þær of ungar til þess að mega ljúka grunnprófi. Úttektin samanstendur af fjögurra daga prófatörn þar sem hundur þarf að ná prófi fjóra daga í röð til þess að standast kröfur. Snjóflóðaleitarprófin eru haldin einu sinni á ári.

Ghazi var skráður í útkallspróf og rúllaði því að sjálfsögðu upp. Hann er því kominn á útkallslista í snjóflóðaleit hjá Leitarhundum Slysavarnarfélagsins Landsbjargar og Björgunarsveitinni Ársæl í Reykjavík. Ghazi er þriðji hundurinn okkar sem fer á útkallslista hjá björgunarsveitunum en við höfum þjálfað hunda til björgunar- og leitarstarfa frá árinu 2007.

Italy og Karma hafa núna verið hjá okkur í eitt ár en við sóttum þær í einangrun 11. mars í fyrra. Við vorum mjög heppin að ná þeim heim rétt áður en covid skall á af fullum þunga en þær voru í síðasta 4 vikna einangrunarhollinu í Móseli. Italy varð 2 ára þann 10. mars. Hún var mynduð fyrr á árinu og er frí af mjaðma- og olnbogalosi. Næsta got hjá okkur verður undan Italy og Ghazi og erum við mjög spennt fyrir þeirri pörun.

Italy er undan heimsfrægum þýskum rakka: Kampus vom Drei Birkenzwinger. Kampus er glæsilegur rakki með flottan sýningarferil en hann varð V1 á Sieger show í Þýskalandi sem er aðal schäfersýning heims. Í móðurætt er Italy barnabarn Ballack von der Brucknerallee. Ballack er einnig heimsfrægur þýskur rakki en hann sigraði á Siger show í Þýskalandi fjögur ár í röð auk þess að sigra Sieger sýningar í öðrum löndum.

Við höfum átt og þjálfað schäferhunda til leitar- og björgunarstarfa frá árinu 2007. Á þessum tíma árs fara árlega fram æfingar í snjóflóðaleit og sækja hundarnir okkar æfingar bæði í nágrenni við höfuðborgarsvæðið og á landsbyggðinni. Öll leitarpróf féllu niður á síðasta ári svo við fögnum því að aðstæður bjóði loks upp snjóflóðaleitarpróf í næsta mánuði. Þangað til halda æfingar áfram og hafa hundarnir gott og gaman af enda gengur leitarþjálfunin út á leik og gleði fyrir hundinn.

Það var ánægjulegt að afhenda spenntum fjölskyldum nýja heimilismeðliminn rétt fyrir jól. Það gengur rosalega vel hjá öllum og erum við mjög stolt af hópnum sem var valinn til þess að sinna þessu skemmtilega en krefjandi verkefni. Hvolparnir eru nú orðnir 3 mánaða og dafna og þroskast vel.

Kynjaskiptingin í hópnum voru 9 tíkur og 2 rakkar. Af þeim var ein tík síðhærð en hinir 10 voru snögghærðir. Hvolparnir fengu eftirfarandi nöfn og raðast hér eftir fæðingarröð:

Eldbergs Aría
Eldbergs Arka
Eldbergs Alda
Eldbergs Alba
Eldbergs Afla Ísafold
Eldbergs Apríl
Eldbergs Anton Berg
Eldbergs Askja
Eldbergs Andri
Eldbergs Ambra
Eldbergs Arða

Hér á eftir koma nokkrar myndir frá síðustu dögunum þeirra hjá okkur. Við vorum afskaplega heppin með veður þrátt fyrir árstíma. Hvolparnir höfðu því tækifæri til þess að fara nokkrum sinnum út yfir daginn og nutu sín ofsalega vel.

Gotið okkar er 6 vikna í dag og því er mikið fjör á heimilinu. Þau sýna öll sterkan karakter og eru dugleg að fara um heimilið, naga og draga leikföng og veltast um hvort annað í leik. Veðrið hefur verið ágætt undanfarið sem gefur okkur tækifæri til þess að leyfa þeim að hlaupa um úti og leika. Daglega takast þau á við alls konar verkefni og áskoranir enda reynum við að hafa umhverfið áhugavert og hvetjandi með fjölbreyttri afþreygingu. Á heimilinu búa einnig þrjú börn og fá því allir hvolpar næga athygli, knús og klapp á milli þess sem þau sofa, borða og leika sér.

Hvolparnir munu flytja á nýju heimilin sín 22. desember. Við erum svakalega stolt og ánægð með hvolpakaupendahópinn okkar og hlökkum til þess að gleðja allar fjölskyldurnar rétt fyrir jól þegar við afhendum þeim nýjasta fjölskyldumeðliminn. Það var gríðarlega erfitt og krefjandi verkefni að fara í gegnum umsóknirnar en því miður gátum við aðeins valið úr lítið brot sem bauðst að lokum hvolpur frá okkur. Við hvetjum því fólk til þess að fylgjast vel með og vera í sambandi við okkur í vetur og næsta vor. Ef allt gengur upp munum við para Italy og Ghazi og gerum ráð fyrir hvolpum næsta sumar.